Ao principio, foi a maxia…

A marioneta funcionou na Prehistoria como medium ritual, xunto con outros obxectos animados aos que se lles atribuía a capacidade de entrar en contacto co Alén, como as máscaras ou os totems. Ademais desta función máxico-relixiosa, os bonecos constituiron un símbolo no que a comunidade se identificaba.

A transformación do rito en espectáculo profano foi un proceso moi lento e seguiu ritmos distintos dependendo das culturas. De feito, o teatro de marionetas na India ou no Sudeste asiático mantén na actualidade un carácter eminentemente relixioso.